अब बझाङबाट सिधै‌ भारत जान सकिने, इन्द्रेणी लालीगुँरास टुर एण्ड ट्राभल्सले बझाङमा टिकट काउन्टर खोल्यो

बझाङ : इन्द्रेणी लालीगुँरास टुर एण्ड ट्राभल्सले बझाङबाट सिधै भारतका विभिन्न शहरमा जान बसको व्यवस्था गरेपछि भारतमा मजदुरी गर्न जानेहरुका लागि सहज भएको छ । बझाङको बाहुली खोला पक्की पुल नजिकै टिकट काउन्टर स्थापना गरेपछि भारत जान सहज भएको हो ।

सोमबार एक कार्यक्रमकाबीच बझाङ बासीको सहजताका लागि इन्द्रेणी लालीगुँरास टुर एण्ड ट्राभल्स सञ्चालक चन्द्र कठायत 'अविनाश' र दिर्घराज उपाध्यायले बाहुली खोला पक्की पुल नजिक टिकट काउन्टर उद्घाटन गर्नुभएको हो । धनगढीबाट नेपालीहरुले विभिन्न बस यातायात समिति मार्फत भारत पुर्‍याउने गरेता पनि बझाङबासीहरु धनगढी, महेन्द्रनगरबाट ठगिने गरेका कारण सहजताका लागि बझाङमै काउन्टर स्थापना गर्नुपरेको सञ्चालक चन्द्र कठायत 'अविनाश' ले बताउनुभयो ।

उद्घाटन कार्यक्रममा जयपृथ्वी नगरपालिकाका मेयर विरेन्द्र खड्काले रिवन काटि दियो बालेर काउन्टर उद्घाटन गर्नु भएको हो । कार्यक्रममा जयपृथ्वी नगरपालिका वडा नम्बर ११ का वडाध्यक्ष केशबहादुर रोकाया लगायत विभिन्न राजनितिक दलका पार्टी प्रतिनिधिहरुको उपस्थिति रहेको थियो ।