बित्थडचिर–६ का जनताका लागि स्वास्थ्य सेवामा २५% छुट, विद्यार्थी नेता मुकेश स्याँडाको पहल

बझाङ जिल्लाको बित्थडचिर गाउँपालिका वडा नम्बर ६ का जनताले अब धनगढी, कैलालीस्थित नोभा अस्पतालमा २५ प्रतिशत छुटसहित स्वास्थ्य सेवा लिन सक्ने भएका छन्।

यो सुविधा अनेरास्ववियु सुदूरपश्चिम प्रदेश कमिटीका सदस्य तथा स्थानीय युवा नेता मुकेश स्याँडाको पहलमा सम्भव भएको हो।

स्वास्थ्य सेवा सुलभ र सहज बनाउने लक्ष्यका साथ, उनले नोभा अस्पतालसँग समन्वय गरी २०८२ सालको वैशाख २४ गते अस्पताल प्रशासनसँग औपचारिक सम्झौता गरेका हुन्। सम्झौतामा अस्पतालका प्रमुख प्रशासनिक अधिकृत गीता खत्री र विद्यार्थी नेता स्याँडाले हस्ताक्षर गरेका छन्।

अब वडा नम्बर ६ का बासिन्दाले सामान्य उपचारदेखि विशेष स्वास्थ्य परीक्षणसम्म, सबै प्रकारका सेवामा छुट पाउनेछन्।
छुटको सुविधा लिनका लागि नागरिकता वा वडा कार्यालयबाट प्रमाणित परिचय खुल्ने कागजात देखाउनुपर्नेछ।

विद्यार्थी नेता स्याँडाले भन्नुभयो –
"गाउँका दाजुभाइ तथा दिदीबहिनीहरूले गुणस्तरीय र सहज स्वास्थ्य सेवा पाउन सकून् भन्ने सोचले मैले यो पहल गरेको हुँ। यस्ता जनहितका कार्यक्रमहरू भविष्यमा पनि निरन्तर अगाडि बढाउने छु।"