मेरै कार्यकालमा थलारा -१ का सबै टोलमा सडक, विद्युत र इन्टरनेट पुग्छ : वडाध्यक्ष जोशी

थलारा गाउँपालिका वडा नम्बर–१ का वडाध्यक्ष रविन्द्र जोशीले सञ्चार, सडक र विद्युतजस्ता आधारभूत सेवा सुविधाहरू वडा अन्तर्गतका सबै टोलटोलमा पुर्या‍उने प्रतिबद्धता जनाउनु भएको छ।

जयपृथ्वी एफएमको जयपृथ्वी संवाद कार्यक्रममा बोल्दै वडाध्यक्ष जोशीले आफ्नो वडा सुगम नजिकको दुर्गम वडा भएकाले केही गाउँहरू अझै पनि आधारभूत सेवा सुविधाबाट वञ्चित रहेको बताउनुभयो। विशेष गरी चुथी, भनाडा, पिपलकोट लगायतका बस्तीहरूमा सडक, बिजुली, टेलिफोन र इन्टरनेट सेवा नपुगेको भन्दै आफ्नो कार्यकालमा ती सेवा पुर्‍याइ छोड्ने लक्ष्य रहेको उहाँले बताउनुभयो।

युवा बेरोजगारीको विषयमा वडाध्यक्ष जोशीले युवालाई वैदेशिक रोजगारमा मात्र निर्भर नहुन आग्रह गर्दै बाँझो जमिन खनजोत गरेर कृषि उद्यममा लाग्न सुझाव दिनुभयो। उहाँले वडामा उत्पादनमुखी सोच विकास गर्न जरुरी रहेकोमा जोड दिनुभयो।