बझाङमा लागूऔषध चरेशसहित एक जना पक्राउ

बझाङको जयपृथ्वी नगरपालिकामा लागु औषध चरेशसहित एक जना पक्राउ परेका छन्। गोप्य सूचनाका आधारमा गएको प्रहरी टोलीले जयपृथ्वी नगरपालिका–९, चिउडीखानबाट लागुऔषध चरेशसहित शेरबहादुर बोहरालाई पक्राउ गरेको हो।

इलाका प्रहरी कार्यालय बझाङका अनुसार सुर्मा गाउँपालिका–२ घर भई हाल चिउडीखानमा डेरा गरी बस्दै आएका अन्दाजी ३२ वर्षीय बोहराको साथबाट १ किलो ६९० ग्राम चरेश जस्तो देखिने कालो पदार्थ फेला परेको हो। बिहीबार राति करिब १०:३० बजेको समयमा बोहराले प्लाष्टिकको झोलामा लुकाइछिपाई बोकेको अवस्थामा उक्त पदार्थ फेला पारी प्रहरीले नियन्त्रणमा लिएको जनाएको छ। पक्राउ परेका बोहरामाथि थप अनुसन्धान भइरहेको जिल्ला प्रहरी कार्यालय बझाङले जनाएको छ।