पसलमै सुतेर, लुडो खेलेर दिन कटाउँछन् बझाङका व्यापारीहरु

दशैं तिहार नजिकिनै लागे पनि बझाङका साना ठूला बजारहरुमा व्यापार नहुँदा व्यापारीहरु हैरान भएका छन् । बझाङको सदरमुकाम चैनपुरसहित झोता, देउरा, बाग्थला, देउरा, बिजगडा, देउलेख, खौला, पसलबगर लगायतका साना ठूला बजारहरुमा व्यापार व्यवसाय दिनानुदिन खस्किदै गएको हो ।

पछिल्लो समय देशकै आर्थिक अवस्था कमजोर भएका कारण सामान्य नागरिकसँग पैसा नहुँदा पसलसम्म पुग्ने गरेका छैनन् । सेवाग्राही पसलमा नआउँदा व्यापारीहरु पसलमै सुतिराख्ने, मोबाइल चलाउने र लुडो खेल्ने जस्ता काम गरि दिन कटाउने गरेको बिजगडाका व्यापारी अर्जुन धामीले बताउनुभयो ।

यस्तै व्यापार नहुँदा पहिलेदेखिका सामान पसलमै थन्किएको देउलेखका व्यापारी मोहन बोहराले गुनासो पोख्नुभयो । चाडबाडका समयमा पहिले धेरै ठूलो भिड लाग्ने गरेको तर यसपालि ग्राहक भेटाउनै मुस्किल भएको उहाँको भनाई छ । यस्तै चैनपुर चौराहमा लामो समयदेखि लुगाकपडा व्यापार गर्दै आउनुभएका पदम खड्काले पनि मुस्किलले दैनिक एक दुई जना ग्राहक पसलमा छिर्ने गरेको बताउनुभयो ।

व्यापार व्यवसाय ध्वस्त हुँदा पछिल्लो आफ्नो दिन लुडो खेलेर बित्ने गरेको उहाँको भनाई छ । पहिले यस समय चैनपुरमा धेरै भिडभाड हुने र मनग्य आम्दानी गरेको भए पनि पछिल्लो समय गाउँ केन्द्रित बजार बन्दै जानु, यातायातको व्यवस्था हुनु र नागरिकसँग पर्याप्त पैसा नहुनुले पनि ठूला बजारहरुमा किनमेल कम हुने गरेको छ ।  ग्राहक नहुँदा बझाङका साना ठुला बजारमा व्यापार घाटा हुँदै आएको छ।