केदारस्युँ गाउँपालिका उपाध्यक्ष धामीले गरिन् पहिरो पिडितको घरमा एक हप्ताभित्र राहत पुर्‍याउने प्रतिबद्धता 

पहिरोले घरमा क्षति पुर्‍याउँदा विस्थापित बनेका केदारस्युँ गाउँपालिका ७ का  सिंगो धामीको परिवारलाई केदारस्युँ गाउँपालिका उपाध्यक्ष मनिशा धामीसहितको टोलीले अनुगमन गरेको छ ।  गाउँपालिका उपाध्यक्ष मनिशा धामीसहित वडा न ४ का वडा अध्यक्ष चन्द्रबहादुर धामी, एकीकृत समाजवादी जिल्ला अध्यक्ष ईन्द्रबहादुर भण्डारीसहितको टोलीले सो क्षेत्रको अवस्थाबारे जानकारी लिनुका साथै अवस्थाबारे अध्ययन गरेको हो । 

पीडित परिवारसँग भेटघाट गरेर उनीहरु अवस्थाबारे जानकारी लिएको गाउँपालिका उपाध्यक्ष धामीले बताउनुभयो । टोलीले पहिरो कारण त्यहाँ भएको असरबारे अध्ययन तथा जनताका समस्याबारे जानकारी लिएको हो । बाढी पहिरोका कारण विस्थापित बनेको परिवार कहाँ पुगेर उपाध्यक्ष धामीले एक हप्ताभित्र राहत उपलब्ध गराउने प्रतिबद्धता गर्नु भएको छ । 

साउन ३ गते मंगलबार आएको अविरल बर्षाका कारण सिङ्गो धामीको घरमा पहिरोले क्षति पुर्‍याएको थियो । पहिरो पिडित धामीका अनुसार आफू राती सुतिरहेका बेला घरको माथिबाट पहिरो आएको र बल्लतल्ल ज्यान बचाउन सफल भएका हुन् । पहिरोमा परेर घरमा रहेको सर-सामान सहित ११ लाख बराबरको क्षति भएको पिडित धामीले बताए ।