१७ लाख बढी भारतीय रुपैयाँसहित धनगढीका दुई युवक पक्राउ

बझाङ: धनगढीका दुई युवक १७ लाख बढी भारतीय रुपैयाँसहित पक्राउ परेका छन्। शनिबार सशस्त्र प्रहरी बल, नेपाल नम्बर ३४ गण हेडक्वाटर कैलालीबाट खटिएको गस्ति टोलीले केन्द्रीय ईन्टेलिजेन्स ब्युरोको विशेष सूचनाको आधारमा दुई जनालाई पक्राउ गरेको हो।

पक्राउ पर्नेमा धनगढी उपमहानगरपालिका-१ शान्तिनगर बस्ने १७ वर्षीय विवेक चन्द र सोही ठाउँका १८ वर्षीय सरोज धामी रहेका सशस्त्र प्रहरी बल नेपाल नम्बर ३४ गण हेडक्वाटर कैलालीले जनाएको छ। उनीहरुको साथबाट १७ लाख ६६ हजार ६७० भारतीय रुपैयाँ बरामद गरिएको प्रहरीले बताएको छ। बरामद रुपैयाँ थप अनुसन्धानका लागि राजश्व अनुसन्धान कार्यालय कोहलपुर बुझाउने प्रकृयामा रहेको बताइएको छ।