बझाङमा निषेधाज्ञा थपियो, अक्सिजन ग्यास मगाउनेदेखि डाक्टर नियुक्ति गर्ने डिसिसिएमसीको निर्णय

बझाङ : बझाङमा निषेधाज्ञा थप्नेदेखि अस्पताल व्यवस्थापन, आइसोलेसन निमार्ण व्यवस्थापन गर्नेसम्मका निर्णय डिसिसिएमसीले गरेको छ । शुक्रबार जिल्ला प्रशासन कार्यालयमा बसेको जिल्ला कोभिड-१९ व्यवस्थापन सञ्चालन केन्द्र (DCCMC) को बैठकले जेठ २ गतेसम्म निषेधाज्ञा लागू गर्ने, अक्सिजन ग्यास सिलिण्डर माग गर्ने, विशेषज्ञ डाक्टर नियुक्त गर्ने, जिल्ला अस्पताल बझाङमा थप आइसोलेसन बेड निर्माण गर्ने र प्रत्येक स्थानीय तहमा कम्तिमा २० बेडको आइसोलेसन यथासिघ्र निमार्ण गर्ने लगायतका निर्णय गरेको छ । 

जिल्लामा बाहिरबाट आउने क्रम र जथाभावी हिडडुल गर्ने क्रम नरोकिएको, संक्रमणदर बढ्दै गएको र मृतक‍दर पनि बढेको डिसिसिएमसीको निष्कर्ष छ । यसअघि बझाङमा बैशाख २० गते लागु गरिएको निषेधाज्ञा २६ गतेसम्म रहने जनाइएको थियो । 

निषेधाज्ञा यता बझाङमै ६ जनाको कोरोनाकै कारण ज्यान गइसकेको छ भने जिल्लामा बाहिरबाट आउनेहरु सोझै गाउँघरमा जाँदा कोरोना महामारीको जोखिम झनै बढेको छ । यस्तै स्थानीय तहले समयमै आइसोलेसन तयार नपार्दा यस्तो भयावह स्थिति आएको जिल्ला अस्पताल बझाङले जनाएको छ ।