थान शिव मन्दिरको निर्माण कार्य सुरु, युवा अभियन्ता जनक ठगुन्नाको नेतृत्वमा चन्दा संकलन

छबिसपाथिभेरा –  पुस्तौंदेखि जीर्ण अवस्थामा रहेको छबिसपाथिभेरा गाउँपालिका-५ स्थित लामन हिमालको तल रहेको थान शिव मन्दिरको पुनर्निर्माण कार्य सुरु भएको छ। स्थानीय युवाहरूको सक्रियतामा चन्दा संकलन गर्दै मन्दिर निर्माण कार्यको औपचारिक उद्घाटन गरिएको हो ।

यस ऐतिहासिक धार्मिक स्थललाई स्थानीय बासिन्दाले साक्षात भगवानको रूपमा मान्दै आएका छन्। जनविश्वास अनुसार, यहाँ साँचो मनले गरिएको मनोकामना पूरा हुने मान्यता रहिआएको छ। यही धार्मिक तथा सांस्कृतिक आस्थालाई पुनर्जागृत गर्दै युवा अभियन्ता जनक ठगुन्नाको नेतृत्वमा पुनर्निर्माण अभियान सुरु गरिएको हो।

मन्दिर पुनर्निर्माणसँगै आगामी वर्षहरूमा यहाँ शिवरात्रि मेला स्थायी रूपमा आयोजना गर्ने योजना बनाइएको छ। साथै, यस स्थानलाई पर्यटकीय गन्तव्यका रूपमा विकास गर्ने उद्देश्यसमेत राखिएको छ। धार्मिक र प्राकृतिक सौन्दर्यको संगम रहेको यो ठाउँ धार्मिक पर्यटकका लागि महत्वपूर्ण गन्तव्य बन्न सक्ने स्थानीयहरूको विश्वास छ।

मन्दिर निर्माण कार्यमा स्थानीय समुदाय, प्रवासी नेपाली तथा भक्तजनहरूको उल्लेखनीय सहयोग प्राप्त भइरहेको छ। यो अभियान सफलतापूर्वक सम्पन्न भएमा धार्मिक तथा सांस्कृतिक रूपमा मात्र नभई आर्थिक र पर्यटकीय हिसाबले पनि गाउँपालिकाको समग्र विकासमा टेवा पुग्ने अपेक्षा गरिएको छ।