बझाङको झोता, देउरा र देउलेख बजारमा पुग्यो टेलिकमको अप्टिकल फाइबर लाइन

बझाङका तीन प्रमुख बजारहरुमा यही असोज १८ देखि नेपाल टेलिकमले अप्टिकल फाइबर लाइन वितरण सुरु गर्ने भएको छ । टेलिकम बझाङको केदारस्युँ गाउँपालिकाको झोता, देउरा र बित्थडचिर गाउँपालिकाको देउलेखमा यही असोज १८ गतेबाट तिब्र गतिको इन्टरनेट र गुणस्तरिय फोनका लागि ल्याण्डलाइन सेवा वितरण गर्न लागेको हो । 

नेपाल टेलिकम प्रादेशिक कार्यालय अत्तरियाका सहायक प्राविधिक अधिकृत गोबिन्द अवस्थीका अनुसार हाल झोता बजार र देउरा बजारमा अप्टिकल फाइबर लाइन विच्छ्याउने कार्य सम्पन्न भएको छ । उहाँका अनुसार बित्थडचीरमा पनि फाइबर लाइन बिच्छ्याउने काम अन्तिम चरणमा छ । दशैं अगाडी घरघरमा इन्टरनेट पुगाउने लक्ष्यका साथ यी तीन बजारमा फाइबर लाइन बिस्तार कार्य सुरु भएको हो । 

एक बजारमा ५ सय १२ वटा राउटर चलाउन सक्ने क्षमताका साथ केही दिनभित्र ओएलटी मेसिन पनि जडान गरिदैछ । बर्षभरीको ८ हजार ५०० मा वाइफाइ राउटर पोलबाट घरभित्रैसम्म पुग्ने फाइबर लाइन दिने अफर झोता, देउरा र देउलेखबासीलाई रहेको छ । यहाँका सेवाग्राहीले बढीमा ५० एमबीपिएस गतिको इन्टरनेट र एक ल्याण्डलाइन चलाउन पाउनेछन् । फाइबर लाइन विस्तारको जिम्मा दार्चुलाको सिंह निर्माण सेवाले पाएको छ ।