जयपृथ्वी अस्पतालका स्वास्थ्यकर्मीमाथि दुर्व्र्यवहार गर्ने दुई जना प्रहरी नियन्त्रणमा

जयपृथ्वी अस्पताल प्रा.लि चैनपुरको फार्मेसीमा कार्यरत एक स्वास्थ्यकर्मीमाथि हातपात गर्ने व्यक्तिलाई प्रहरीले पक्राउ गरेको छ । हिजो जयपृथ्वी अस्पतालमा कार्यरत स्वास्थ्यकर्मीमाथि हातपात गर्ने ठाउँका सुदिप सुनार र सन्तोष कुवरलाई पक्राउ गरिएको हो ।

घाइते भएका स्वास्थ्यकर्मी खड्कालाई भने जिल्ला अस्पताल बझाङमा सामान्य उपचार पश्चात थप उपचारको लागि धनगढी रिफर गरेको र उहाँको अवस्था अहिले मध्यम रहेको जनाईएको छ । प्रिगावलिन, ट्रामाडोल र कफट्याव डि नामक औषधि माग्न खोज्दा डाक्टरको सल्लाह विना औषधी दिन सकिन्न भनेपछि अस्पतालमा कार्यरत स्वास्थ्यकर्मी तथा फार्मासिष्ट मदन खड्का माथि अभद्र व्यवहारसँगै कुटपिट भएको थियो ।

यी औषधी संवेदनशिल भएकाले डाक्टरको अनुमति विना खुल्ला रुपमा बिक्री वितरण गर्न पाइँदैन । यी औषधीलाई यहाँका युवाले लागुऔषधका रुपमा प्रयोग गर्दै आएको खुलेको छ ।

दसैैंको बिदाको दिनमा पनि नागरिकको स्वास्थ्य उपचारका लागि ड्युटिमा खटिएका स्वास्थ्यकर्मीमाथि कुटपिट भएको भन्दै जयपृथ्वी अस्पतालले प्रेस विज्ञप्तीसमेत जारी गरेको थियो । स्वास्थ्यकर्मीमाथि कुटपिट तथा दुव्र्यवहार गर्नेलाई कडा कारबाही गर्न अस्पतालले माग गरेको छ ।