अबरुद्ध जयपृथ्वी राजमार्ग २२ घण्टापछि सुचारु, रोकिएका सवारी साधन गन्तब्यतिर लागे

आइतबार दिउँसोदेखि अबरुद्ध खोड्पे–बझाङ जोड्ने जयपृथ्वी राजमार्ग आज बिहान २२ घण्टापछि १०:३० बजेबाट पुन: सुचारु भएको छ । बैतडीको पाटन नगरपालिका -८ झौलेक मोड नजिक सडकमाथिबाट खसेको ढुंगाले सडक अबरुद्ध भएको राजमार्ग बझाङबाट गएको मेसिनले बीच सडकमा रहेको ढुंगा हटाएसँगै पुन: सुचारु भएको  हो । 

आइतबार दिउँसो ०१:०० बजे सडक माथिबाट ठुलो ढुंगा खसेर राजमार्ग अवरुद्ध भएको थियो । सडक अबरुद्ध भए लगत्तै दुईवटा जेसीबी लगाएर ढुंगा फाल्ने प्रयास गरिएको थियो । तर जेसीबीले ढुंगा फाल्न नसकेपछि बझाङको झोताबाट  गएको मेसिनले ढुंगा हटाएपछि राजमार्ग सुचारु भएको हो ।  

राजमार्ग अवरुद्ध हुँदा  सवारी साधन रोकिएर  यात्रुहरु बीचबाटोमै अलपत्र परेका थिए । अवरुद्ध सडक खुलेपछि बाटोमै रोकिएका सवारीसाधन आ–आफ्नो गन्तब्य तर्फ लागेका खोडपे प्रहरी चौकीका इन्चार्ज बिकले बताए ।