खेल

सन्दीप र दीपेन्द्रले गुमाए एसीसी इमर्जिङ टिम्स एसिया कप

जयपृथ्वी खबर

शुक्रबार, असार २२, २०८०

सन्दीप र दीपेन्द्रले गुमाए एसीसी इमर्जिङ टिम्स एसिया कप

नेपाली राष्ट्रिय टाेलीका स्पिनर सन्दीप लामिछाने र अलराउन्डर दीपेन्द्रसिंह ऐरीले एसीसी इमर्जिङ टिम्स एसिया कप नखेल्ने भएका छन् ।

लामिछाने र ऐरी दुवै जना क्यानडाको ग्लोबल टी–२० लिग खेल्न जाने भएका कारण श्रीलङ्कामा हुने एसिसी इमर्जिङ टिम्स कप गुमाउने भएका हुन् । जिम्बावेमा भएको आईसीसी एकदिवसीय विश्वकप छनोट खेलेर आज शुक्रवार स्वदेश फर्किएपछि नेपाली टाेलीका कप्तान रोहित पौडेलले दुई जना खेलाडीले एसीसी इमर्जिङ टिम्स एसिया कप गुमाउने जानकारी दिएका हुन् ।

इमर्जिङ टिम्स एसिया कप जुलाई १३ देखि २३ सम्म हुँदैछ । जुलाई २० देखि अगस्ट ६ सम्म हुने ग्लोबल टी–२० क्यानडा लिगमा नेपालबाट सन्दीप र दीपेन्द्र छानिएका हुन् ।

दीपेन्द्रले पहिलाे पटक विदेशी लिगका रूपमा याे प्रतियाेगिता खेल्न लागेका हुन् भने सन्दीपले यसअघि दुई पटक याे लिग खेलिसकेका छन् । दीपेन्द्रलाई मोन्ट्रेल टाइगर्सले 'ड्राफ्ट' मार्फत अनुबन्ध गरेको छ भने सन्दीप यस पटक सर्रे जागुअरमा अनुबन्ध भएका छन् ।

नेपालले एसीसी प्रिमियर कपको उपाधि विजेताको रूपमा एसीसी इमर्जिङ टिम्स एसिया कप खेल्न लागेको हो ।

नेपाल इमर्जिङ कपको समूह 'बी' छ । याे समूहमा नेपालसँगै यूएई, पाकिस्तान 'ए' र भारत 'ए' छन् । त्यस्तै समूह 'ए' मा श्रीलङ्का, बङ्गलादेश, अफगानिस्तान र ओमान छन् ।

प्रकाशित मिति: शुक्रबार, असार २२, २०८०

प्रतिक्रिया दिनुहोस्

जयपृथ्वी खबर

यो रेडियो जयपृथ्वी एफ.एम. बझाङद्धारा सञ्चालित अनलाइन हो । २०७८ सालको जयपृथ्वी बहादुर सि‌ंहको जन्मजयन्तीको शुभ अवसर पारी स्थापना भएका यो रेडियो तथा अनलान न्युज पोर्टलले ताजा,सन्तुलित र निष्पक्ष समाचार र लेख रचना प्रसारण प्रकाशन गर्दै आएको छ।

थप खेल