बिसु मनाउने सपना झौलेख अस्तायो, मध्यरातमा बझाङका ६ जना गाउँलेले ज्यान गुमाए

पाटन नगरपालिका- ८ झौलेकमा मंगलबार मध्यरात जीप दुर्घटना हुँदा ६ जनाको घटनास्थलमै मृत्यु भएको छ । ५ जनाले हामफालेर ज्यान जोगाएका छ्न्।

जिल्ला प्रहरी कार्यालयका बैतडीका अनुसार झुलाघाटबाट बझाङको बाग्थला तर्फ आइरहेको से १ ज ७६४ नम्बरको जिप दुर्घटना हुँदा बझाङ केदारस्युँ गाउँपालिका-५ बाँझका ६ जनाको घटनास्थलमै मृत्यु भएको हो। 

मृत्यु हुनेमा बाँझका ६० वर्षका मने बोहरा, ४२ का नरे बोहरा, ४५ का गोरख बोहरा, ४५ कै मान बहादुर धामी, बिर्ख धामी र ४० वर्षका बिरे धामी रहेका छन् । जीप झौलेकको मोडबाट करिब ५ सय मिटर तल खसेको छ । केदारस्यूँ गाउँपालिका ५ को बाँझका जंगी बोहराका अनुसार भारतको पिथौरागढबाट एकै गाउँका ११ जना मिलेर मंगलबार जिप रिजर्भ गरेर बझाङ आइरहेका थिए । राति बाग्थला पुग्ने सोच बनाएका उनीहरु  राती १० बजे खोडपे पुगेका थिए । 

खोडपेबाट करिब ७ किलोमिटर बझाङतर्फ पाटन नगरपालिका ८ को झौलेक मोडको उकालोमा गुडिरहेको गाडी एक्कासी पछाडी धकेल्लिदा दुर्घटना भएको हो । जिप सडक किनारबाट भिरतर्फ जाने क्रममा पछाडी सवार जंगी बोहरासहितका ५ जनाले हाम फालेर बच्न सफल भए भने जिपको अगाडी सवार रहेका ६ जनाको घटनास्थलमै मृत्यु भएको हो । उनीहरु सबै जना एकै गाउँका रहेको र सबै यात्रु भारतमा मजदुरी गर्ने र नयाँ वर्ष तथा बिसु मनाउन घर फर्किरहेका थिए ।