रायल–उत्गडी सिमार जोड्ने ट्रस पुलले तिव्रता लियो, आगामी असारमा गाडी वारपार हुने

निर्माणाधीन रायल–उत्गडी सिमार जोड्ने ट्रस पुलले तिव्रता लिएको छ । लामो समयदेखि अधुरो रहेको केदारस्युँ गाउँपालिकाको रायल र थलारा गाउँपालिकाको उत्गडी जोड्ने ट्रस पुलको निर्माण कार्यले तिव्रता लिए थलाराबासीमा खुशीयाली छाएको छ । सेती नदीमाथि बनिरहेको ७७ मिटर लामो ट्रस पुल आगामी असारसम्म गाडी चल्ने गरि अगाडी बढिरहेको छ ।

संविधानसभा सदस्य एलबी रावलले आफू संसदमा हुँदा पहल गरेको यो पुलमा झण्डै ८ वर्षदेखि काम हुन सकेको थिएन ।  ८१ करोडको लागत अनुमान गरिएको यो पुलमा कालिका चन्द सेवाले ठेक्का सम्झौता गरेको भए पनि निर्माणको जिम्मा भने ग्वाल्लेख निर्माण सेवाले पाएको छ ।

पहिलेको सम्झौता अनुसार निर्माण कार्य नभएपछि पुन: म्याद थप गरि अहिले तिव्र गतिमा काम भइरहेको यो पुलको ट्रसिङको काम यसै चैत महिनामा सकिनेछ भने आगामी वैशाखमा पुलमाथि आरसीसी ढलानको काम सुरु गरि असारमा पूर्ण रुपमा सवारी साधन गुड्न योग्य हुने साइट इन्जिनियर सन्तोष चन्दले बताउनुभयो । यो पुल निर्माण भएपछि विशेषगरी थलाराको वडा नम्बर १ वडा नम्बर र वडा नम्बर ३ बासीले भोग्दै आएको यातायात समस्या समाधान हुने थलामरा २ का स्थानीय देवेन्द्र सायरले बताउनुभयो ।

अहिले यी तीन वटा वडाका बासिन्दाहरुले देउरा हुँदै पैदल यात्रा र ३ घण्टा टाढा झनानाबाट गाडीको यात्रा गर्नु परिरहेको छ । सेती नदीमा बनेका पुलहरु सेतीवारीका बासिन्दाहरुलाई असमान दुरी र भौगोलिक कठाइले गर्दा यात्रा गर्न शकस हुँदै आएको छ ।