बझाङको सदरमुकाम चैनपुर बजारमा सिसि क्यामेरा जडान

बझाङ: बझाङको सदरमुकाम चैनपुरमा सिसि टिभी क्यामरा जडान गरिएको छ । जयपृथ्वी नगरपालिकाले चैनपुर बजारमा सिसि क्यामेरा जडान गरेको हो । दैनिक चोरीका घटनाहरु बढे पछि त्यसको निगरानी गर्न सिसि टिभी क्यामरा जडान गरिएको बताईएको छ । बजारका मुख्य मुख्य ठाउँहरुमा सिसि क्यामेरा जडान गरिएको जयपृथ्वी नगरपालिकाका प्रमुख प्रशासकिय अधिकृत अम्मरराज जोशीले जानकारी दिएका छन् । करिब पाँच लाखको लगानीमा १६ वटा क्यामेरा जडान गरेको उनले जानकारी दिए । बजारमा जोडिएका क्यामेराको कन्ट्रोल जिल्ला प्रहरी कार्यालय बझाङमा रहेको छ । अब चोरी र झै झगडा गर्नेहरुको रेकर्ड सिसि क्यामेराबाट हेर्न सकिने जिल्ला प्रहरी कार्यालय बझाङका सुचना अधिकारी तथा इन्सपेक्टर रमेशदत्त अवस्थीले बताए ।

बजार क्षेत्रमा आवश्यकता अनुसार सिसि क्यामेरा जडान भएपछि प्रहरीलाई पनि सहज भएको अवस्थीको भनाई छ । सदरमुकाम चैनपुर बजारमा सिसि क्यामेरा जडान भएपछि त्यसले सुरक्षित वातावरण बनाउने स्थानीयबासीहरुले बताए । डङ्ुग्री पुल, पानकोट पुल, खुल्ला मञ्च, लोकतान्त्रीक चोक, देविथान मन्दिर, सुर्मा टोल, लगायतका स्थानमा क्यामरा जडान गरिएको छ । सीसी क्यामेराको जडानसँगै सुरक्षित नगरको कार्य थालनी भएको उद्योग वाणिज्य संघ बझाङका अध्यक्ष दान बहादुर सुर्मेलिले बताए । आफुहरुको पहिले देखिको माग नगरपालिकाले सम्बोधन गरेको र सीसी क्यामेराको जडान कार्य महत्वपूर्ण रहेको बताउँदै सुरक्षित सहर निर्माणमा आफूहरू सहकार्य गर्न तयार रहेको सुर्मेलिले बताए । सीसी क्यामेरा जडानसँगै बजार क्षेत्रका व्यापारीहरूले सुरक्षित महसुस गर्ने समेत अध्यक्ष सुर्मेलिको भनाई छ ।