नेकपा एस बझाङका जिल्ला कमिटी सचिवालय सदस्य बोहरा नेकपा एमालेमै फर्किए

बझाङ: नेकपा एकीकृत समाजवादीका बझाङ जिल्ला कमिटी सचिवालय सदस्य अकवर बोहरा नेकपा एमालेमा फर्किनु भएको छ । आज बुंगल नगरपालिकामा नेकपा एमाले प्रदेश सभा (((ख) मा उम्मेदवार लालबहादुर रावलको चुनावी प्रसार प्रचारको क्रममा एमालेका नेताहरु संगको भेटभाटपछि उहाँले एकीकृत समाजवादीलाई परित्याग गरी नेकपा एमालेमै फर्किएको बताउनु भएको छ । नेकपा एमाले विभाजनको समयमा नेकपा एकीकृत समाजवादीमा रहेर जिल्ला कमिटी सचिवालय सदस्यमा रही काम गर्दै आएका बोहरालाई प्रदेश सभा (ख) का उम्मेदवार रावलले स्वागत गर्नू भएको छ । 

बोहरा २०७४ सालको स्थानीय तहको निर्वाचनमा नेकपा एमालेको तर्फबाट बुंगल नगरपालिका वडा नं. ८ को वडा अध्यक्षका उम्मेदवार रहेका थिए । बोहराले पछिल्लो समय एकीकृत समाजवादीका गतिविधीहरु राम्रो नभएको र देशमा अनन्तकाल सम्म नेकपा एमाले र नेपाली काँग्रेस मात्र राजनैतिक शक्तिको रुपमा रहने भएकाले अरु पार्टीमा अलमलिएर बस्नु उचित नहुने भन्दै आफु पुनः एमालेमा नै फर्किएको बताउनु भयो । बोहराले आजै देखी नेकपा एमाले र एमालेका उम्मेदवारहरुलाई जिताउनका लागी आफु प्रचारप्रसार अभियानमा समेत सक्रिय हुने बताउनु भएको छ ।