निर्वाचन स्थगित भएका बझाङका २ पालिकामा जेठ १ र २ गते निर्वाचन हुँदै

बझाङ : बैशाख ३१ बझाङको जयपृथ्वी नगरपालिका-७ स्थित सुनिपिपल मावि सुवेडा केन्द्रमा पुन मतदान हुने भएको छ । प्रमुख जिल्ला अधिकारी बाबुराम अर्यालका अनुसार शनिबार जिल्लामा मुख्य निर्वाचन अधिकृतको अध्यक्षतामा बसेको बैठकले सुनिपिपल मावि केन्द्रमा १ जेठमा निर्वाचन गर्ने निणर्य गरेको छ ।

शुक्रबार भएको निर्वाचनमा मतदान स्थलमा विवाद भएपछी सर्वदलीय बैठक बसेर निर्वाचन स्थगित गरिएको थियो । उक्त मतदान केन्द्रमा ढुंगामुडा, हुलदंगासहित मतपेटीका फुटाएपछी मतदान अर्को सूचना नहुदा सम्मका लागि सो केन्द्रमा स्थगित गरिएको थियो ।

त्यस्तै केदारस्युँ गाउँपालिका-४ स्थित जगन्नाथ मावि शैन्सु केन्द्रमा विवाद भएका कारण स्थगित भएको निर्वाचन जेठ २ गतेबाट पुन हुने जिल्ला निर्वाचन कार्यालय बझाङले जनाकारी दिएको छ । विवादका कारण स्थगित गरिएको सुर्मा गाउँपालिका-२ को आधाबगर मावि डोगडी र वडा नम्बर ३ को कृष्ण प्राविको पनि जेठ २ गते पुनः मतदान गर्ने मिति तोकिएको छ ।